សម្ដេចក្រឡាហោមស ខេង ជំរុញដល់មន្ត្រីរាជការទាំងអស់មានកាតព្វកិច្ចនិងភារកិច្ចបម្រើប្រជាពលរដ្ឋ
23-March-2016 | ដោយ មែន កំសត់
កំពង់ស្ពឺ ៖ សម្ដេចក្រឡាហោម ស ខេង នាយរដ្ឋមន្ត្រីស្ដីទី និងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញដល់មន្ត្រីរាជការទាំងអស់ ត្រូវតែចេះរួបរួមសាមគ្គីគ្នាដើម្បីបំពេញកាតព្វកិច្ច និងភារកិច្ចបម្រើប្រជាពលរដ្ឋ ក្នុងមូលដ្ឋាន ។ ការថ្លែងបែបនេះ ធ្វើឡើងកាលពីរសៀលថ្ងៃទី ២២ ខែមិនា ឆ្នាំ២០១៦ ក្នុងពិធីប្រកាសផ្ទេរភារកិច្ច និងតែងគណៈអភិបាល និងអភិបាលរង ខេត្តកំពង់ស្ពឺ ។
ឯកឧត្តម អ៊ូ សំអួន អតីតអភិបាល ខេត្តកំពង់ស្ពឺ ដែលត្រូវថ្នាក់លើផ្លាស់ប្ដូរទៅកាន់មុខដំណែងថ្មីក្នុងទីស្ដីការ ក្រសួងក្នុងជួរគណៈរដ្ឋមន្ត្រី ហើយត្រូវបានប្រមុខរាជរដ្ឋាភិបាលកម្ពុជា មានទំនុកចិត្តប្រគល់តួនាទីភារកិច្ចជួន ឯកឧត្តម វ៉ី សំណាង អភិបាលរង ខេត្តកំពង់ស្ពឺជាអភិបាលខេត្ត ដើម្បីបន្តការដឹកនាំរដ្ឋបាលខេត្តកំពង់ស្ពឺ ឱ្យមានភាពរីកចំរើន និងការអភិវឌ្ឍន៍លើគ្រប់វិស័យ ក្នុងនោះដែលក៏មានការតែងតាំងឯកឧត្តម ព្រំ វណ្ណៈ ជាអភិបាលរងផងដែរ ។
សម្ដេចក្រឡាហោម ស ខេង នាយករដ្ឋមន្ត្រីស្ដីទី និងជាឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានមានប្រសាសន៍ថា ការផ្ទេរភារកិច្ច តែងតាំងផ្លាស់ប្ដូរតួនាទីភារកិច្ចដល់មន្ត្រីរាជការនេះ វាជារឿងធម្មតាសម្រាប់ក្របខណ្ឌមន្ត្រីរាជការ យោងតាមគោនយោបាយរបស់របស់រាជរដ្ឋាភិបាល មានអភិបាលខេត្ត និងរដ្ឋមន្ត្រីមួយចំនួនផងដែរ ។ សម្ដេចបន្តថា មន្ត្រីរាជការគ្រប់លំដាប់ថ្នាក់ ក្នុងថ្នាក់ក្រោមជាតិត្រូវតែបំពេញភារកិច្ចមួយចំនួនដូចជា ៖ ដើម្បីថែរក្សាការពារសន្តិសុខ សុវត្ថិភាពជួនប្រជាពលរដ្ឋ សង្គមជាតិទាំងមូល និងត្រូវដោះស្រាយបញ្ហាដែលនៅសេសសល់ឱ្យបានចប់សព្វគ្រប់ ជាពិសេសមន្ត្រីអ្នកអនុវត្តន៍ច្បាប់មិនត្រូវមានការធ្វេសប្រហែស គ្រប់គ្រងសណ្ដាប់ធ្នាប់ ក្នុងនោះមានបញ្ហាគ្រោះថ្នាក់ចរាចរណ៍ដែលសម្លាប់មនុស្សជាមធ្យម ៧ ទៅ ៨នាក់ក្នុងមួយថ្ងៃៗ ហើយខេត្តកំពង់ស្ពឺនេះជាប់ចំណាត់ខ្ពស់អំពីគ្រោះថ្នាក់ចរាចរណ៍ ក្នុងចំណោមខេត្តមួយចំនួនទៀត ដូច្នេះត្រូវរឹតបណ្ដឹង អប់រំដល់ប្រជាពលរដ្ឋឱ្យដឹងពីច្បាប់ចរាចរណ៍បានទូលំទូលាយ និងបញ្ហាគ្រឿងញៀនដែលកំពុងវាយលុកក្នុងស្រទាបយុវជន ដែលជាសសរទ្រូងរបស់ប្រទេសជាតិ សូមអស់លោកបង្កើនការបង្ក្រាបក្រុមជនល្មើសយកមកផ្ដន្ទាទោសតាមច្បាប់ ដាច់ខាតកុំឱ្យមានការចរាចរណ៍ដល់តាមតំបន់ជនបទដាច់ខាត ។
សម្ដេចក្រឡាហោមបានបន្តថា បញ្ហាបម្រែបម្រួលអាកាសធាតុ ការកើតឡើងកម្ដៅព្រះអាទិត្យបានធ្វើឱ្យប្រភពមួយចំនួនត្រូវ រីងស្ងួតដូច្នេះយើងត្រូវយកចិត្តទុកដាក់ និងប្រុងប្រយ័ត្នឱ្យបានខ្ពស់ សូម្បីនៅប្រទេសវៀតណាម ទឹកសមុទ្របានហូរចូលមកគ្របដណ្តប់លើដែនទឹកសាបអស់ប្រមាណជាង១០០ គីឡូម៉ែត្រ ដោយកម្ពស់នីវ៉ូទឹកសមុទ្រខ្ពស់ជាង ។ អំពីបញ្ហាទំនាស់ដីធ្លីដែលកើតមានឡើង មន្ត្រីពាក់ព័ន្ធត្រូវចុះស្រាវជ្រាវរកមូលហេតុដែលបង្កឱ្យមាន ទំនាស់ ក្នុងនោះមន្ត្រីយើងមួយចំនួនចេះតែស៊ីប្រថាប់ត្រាមិនគិតពីផល ប៉ះពាល់ ហើយសម្ដេចបានស្ដីបន្ទោសការលប់ដីអាងស្តុបទឹកអូរក្រាំងអំបិលដែល ឈ្មួញកំពុងតែចាក់រាលថ្ងៃស្ទើរអស់មួយចំហៀងហើយនោះដែរ នៅពេលសួរនាំទម្លាក់កំហុសទៅលើប្រជាពលរដ្ឋជាអ្នកលក់ ប៉ុន្តែអស់លោកបានដឹងហើយថា ដីទាំងនោះជាដីរបស់រដ្ឋហេតុអីហានស៊ីញ៉ែ ប្រថាប់ត្រាទាំងបំពានបែបនេះ ខណៈបឹងបួ ប្រឡាយ ត្រូវបានស្ដារ និងជីកឡើងវិញនោះ ។
សម្ដេចក្រឡាហោម ស ខេង បានបន្តថា ពាក់ព័ន្ធការជ្រើសតាំងមន្ត្រីថ្នាក់ក្រោមជាត គឺរាជរដ្ឋាភិបាលកម្ពុជាតម្រូវជ្រើសរើសអ្នកនៅក្នុងមូលដ្ឋានផ្ទាល់ ព្រោះពួកគាត់មានស្គាល់ភូមិសាស្ត្រច្បាស់លាស់ សភាពការណ៍ និងតម្រូវការរបស់ប្រជាពលរដ្ឋ ប៉ុន្តែត្រូវមានសមត្ថភាព និងបទពិសោធន៍ការងារផងដែរ ។ អាជ្ញាធរមានសមត្ថកិច្ចត្រូវសេវាបម្រើជួនប្រជាពលរដ្ឋគ្រប់ពេលវេលា ដូចជាការចុះបញ្ជីកំណើតឱ្យមានគ្រប់គ្នា ព្រោះមានសារៈសំខាន់ណាស់ ត្រូវតែបំពេញកាតព្វកិច្ច តួនាទីរបស់ខ្លួនឱ្យបានល្អប្រសើរ ការថែទាំសុខុមាលភាពប្រជាពលរដ្ឋ ជំរុញការធ្វើអត្តសញ្ញាណប័ណ្ណជួនប្រជាពលឱ្យបានគ្រប់ផែនការ ដែលផ្ដល់ជួនពលរដ្ឋដែលមានអាយុចាប់ពី ១៥ឆ្នាំឡើងដោយសារវមានសារៈសំខាន់បំផុតក្នុងការចុះឈ្មោះបោះឆ្នោត នាពេលខាងមុខ ព្រោះក្រៅពីអត្តសញ្ញាប័ណ្ណ ដូចជាកាតមន្ត្រីរាជការ កាតប៉ូលិស ទាហាន លិខិតឆ្លងកាតព្រះសង្ឃ និងឯកសារផ្សេងៗ មិនអាចចុះឈ្មោះបោះឆ្នោតបានទេ ក្នុងច្បាប់បោះឆ្នោត ។
សម្ដេចក្រឡាហោមអាជ្ញាធរត្រូវ ជំរុញការធ្វើកសិកម្ម ឧស្សាហកម្ម កសិឧស្សាហកម្ម ធនធានខ្សាច់ ថ្មភ្នំ សុទ្ធតែជាប្រភពនៃចំណូលរបស់រដ្ឋ ដូច្នេះក្នុងមូលដ្ឋានយើងត្រូវគ្រប់គ្រងឱ្យបាន និងស្វែងយល់ ស្រាវជ្រាវធនធានផ្សេងៗទៀត ដើម្បីទាញយកអ្នកវិនិយោគទុនមករកស៊ីក្នុងមូលដ្ឋាន បង្កើនចំណូល និងការងារជួនប្រជាពលរដ្ឋ ។ ក្នុងនោះបន្តការគ្រប់គ្រងជនអន្តោប្រវេសន៍ (ជនបរទេស) ដោយសហការជាមួយនគរបាលអន្តោប្រវេសន៍ឱ្យមានល្អប្រសើរ ដោយសារខេត្តកំពង់ស្ពឺមានតំបន់រោងចក្រឧស្សាហកម្មច្រើន ។
ជាចុងក្រោយសម្ដេចក្រឡាហោម ស ខេង បញ្ជាក់ថា ការងារគ្រប់រដ្ឋបាលខេត្តឱ្យបានល្អប្រសើរនោះ អភិបាលខេត្តថ្មី ត្រូវមានសាមគ្គីភាពយ៉ាងស្អិតរមួតជាមួយប្រធានក្រុមប្រឹក្សាខេត្ត នាយករដ្ឋបាល អភិបាលរង សមាជិកក្រុមប្រឹក្សា មន្ត្រីក្រោមឱវាទទាំងអស់ ក្នុងការបំរើប្រជាពលរដ្ឋ ការអភិវឌ្ឍន៍ក្នុងខេត្ត និងសង្គមជាតទាំងមូលផងដែរ ៕
ចំនួនអ្នកទស្សនា
- ថ្ងៃនេះ3501
- ម្សិលមិញ12921
- សប្តាហ៍នេះ3501
- ខែនេះ198101
- ឆ្នាំនេះ198101
- សរុប20640557